Test di admision pa PABO ta forma un obstaculo te ainda pa futuro maestro.
Test di admision pa PABO ta forma un obstaculo te ainda pa futuro maestro.
Mas o menos un di cada cuater test di admision no ta wordo pasa, esaki ta locual ta Sali na cla for di cifranan cu NU.nl a pidi cerca Vereniging Hogescholen. Algemene Onderwijs Bond (AOb) a nota cu e continuacion di studiante for di MBO pa PABO (Pedagogische Academie Basis Onderwijs) ta basta dificil: “Nos ta perde un cantidad grandi di talent cu potencial pa ta un maestro”, algo cu nos no ta desea pavia di e falta di maestro.
Na aña 2025 Scol Basico lo bay tin mester di 1500 maestro adicional, riba e falta di maestro cu ta existi caba. Sin e toets di admision no a wordo introduce, lo tawata tin mas persona cu un diploma di PABO, asina e investigadornan Inge de Wolf y Stan Vermeulen di e Researchcentrum voor Onderwijs en Arbeidsmarkt a informa NU.nl.
Esaki ta sosede specialmente pasobra desde e introduccion di e test di admision tin menos studiante di MBO cu a sigui cu un studio na PABO.
Ki ora bo tin mag di bay PABO?
Tin tres test di admision: geschiedenis, aardrijkskunde en natuur en techniek.
- Ora bo caba un estudio riba nivel di MBO, bo lo mester pasa tur tres test di admision.
- Ora bo caba Havo, bo lo mester haci solamente e test di admision pa e materia cu bo no a haci examen den dje.
- Cu un VWO diploma bo no mester haci e testnan di admision.
E test di admision a wordo introduci, pa garantisa cu e studiantenan ta drenta cu suficiente conocemento basico, pa asina e studio y instituto no mester perde hopi tempo y placa na re-educacion di e studiantenan. Algemene Onderwijsbond (AOb) ta hayele importante pa e studiantenan cuminsa PABo cu suficiente conocemento. “Sinembargo nos ta ripara tambe cu e testnan di admision ta basta dificil y ta causa cu e doorstroom di e studio pa onderwijsassistent pa cu PABO ta basta duro y cu esey ta causa cu talent educativo ta bay perdi. Locual no ta di desea cu e falta di maestro actualmente.
Cu e testnan ta basta duro pa MBO’ers, ta sali na cla tambe a base di e cifranan di Vereniging Hogescholen. E porcentahe cu ta pasa e testnan ta 15% mas abou ora ta toca studiante di MBO cu ora ta studiante di Havo.
E test di admision ta pre-selecta e miho maestronan?
Cu e test di admision na final ta contribui na miho maestro, nos no por bisa ainda. E prome cohort cu a gradua despues di traha e testnan di admission, apenas a ricibi nan diploma un aña pasa.
De Wolf y Vermeulen ta sigui bisa cu ainda falta hopi datos riba nivel nacional tocante e logronan durante e studio. No ta conosi si e studiantenan desde cu a introduci e test di admision ta logra puntonan mas halto pa nan stage.
Futuro di e test di admission no ta conosi
Pa cuanto tempo mas lo sigui cu e testnan den e forma aki no ta conosi: Barbara de Kort, president di e Landelijk Overleg Lerarenopleidingen Basis Onderwijs (LOBO), ta bisa cu na e mmento aki nan ta evaluando pa wak si mester cambia e testnan of si mester duna un otro uzo na e testnan pa cu admision.
Na e momento aki e enfoke di e testnan ta mas tanto conocemento y ta haci uzo di preguntanan multiple choice. Esaki por contribui cu e studiante ta pusha pa siña y ta lubida tur cos lihe atrobe despues di e test.
AOb ta scirbi cu mester pone mas enfasis riba e conexion entre e estudio pa Onderwijsassistent riba nivel di MBO y e estudio di PABO, pa asina garantisa cu e grupo aki por drenta PABO sin cu nan mester haci e test di admission prome.
Transcirbi pa Gisele Sint Jago
1 oktober 2021
