Locual mester a bira un dia feliz pa celebra cu nan aña scolar a caba, a bira un dia fatal y traumatico pa e 40 muchanan di Hillcrest Primary School na Devonport. Den bista di e maestronan y varios mayor, diripiente un biento duro a lastra e dino jump asina halto. Despues cu mas cu 10 alumno a keda gravemente herida, esnan presente a cuminsa duna prome auxilio na e victimanan te ora cu ambulance y autoridadnan a yega.  Polis di Tasmania a publica e nombernan di e victimanan cu a fayese. Nan ta Addison Stewart (11), Zane Mellor (12), Jye Sheehan (12), Jalailah Jayne-Maree Jones (12) and Peter Dodt (12). Ainda tin 3 mucha den Hospital y un ta recuperando na cas. Devonport, un cuidad riba e isla Tasmania, cual ta 240 km pa Zuid di Australia y ta forma un hub pa esnan cu kier bishita Antartica, ta den luto. E prome dianan polis a collecta testimonio y evidencia na e sitio y a anuncia cu e investigacion ta andando.

 

Mas accidente fatal cu dino jump.

E no ta algo commun, pero den e ultimo añanan tin varios accidente cu ‘dino jump’ cu a resulta den morto y herida:Na ana 2019, dos mucha a muri y 20 hende a keda heridad na China, ora cu un dino jump a wordo hisa den laira door di un torbellino di biento. Un ana prome cu esey, na Inglatera, un dino jump a explota riba beach y a causa morto di un mucha. E mesun ana 2018 un otro dino jump a wordo lastra door di biento cual a resulta den e morto di un mucha di 7 ana. Dos trahador di e dino jump a wordo sentencia pa homicidio involuntario pavia di negligencia cu a resulta den e morto di e criatura.

 

Pone attencion

Na Australia y Tasmania, tur compania di dino jump y nan trahadornan mester wordo registra y cumpli cu exigencianan stipula orden y ley. Tambe e dino jump mester wordo getest y controla si tin scheur caminda e mester wordo pega, prome cu nan ta wordo uza.  Den ley y tambe e fabricantenan ta prohibi  uzo di e aparatonan aki ora cu biento subi 24 mph (38 kmph). E officina meteorologico mas cerca di Devonport a declara cu nan no a registra ningun biento mas duro cu e maximo di 38 kmph y eigenlijk no a ni registra nada mas duro cu 20kmph durante e tempo cu e accidente a tuma luga. Informacion asina lo mester  wordo comunica di biaha cu aeropuerto.  Un dino jump mester wordo mara cu un peso di minimo 163 kg na cada un di e cuanter punto, pues cu minimo 652 kilo. Locual  ta e forsa exacto cu un biento di 27mph lo tin, 1.63 kN,  pa saca un clabo cu ta 38cm largo for di tera. Como cu na Aruba e tera ta hopi mas duro, pa es motibo casi semper un dino jump ta wordo mara cu bloki grandi y pisa di cement. Lo ta importante pa autoridadnan tuma nota si tur caminda rond Aruba ta cumpli cu tur protocol di seguridad pa cu e dino jumps, como cu biento na Aruba e ultimo dianan ta surpasa 38 kmph frequentamente.

 

 

Extra:

Tasmania ta un di 26 isla pa zuid di Australia den Oceano Pacifico/Stille Oceaan cu a wordo colonisa. e habitantenan original, es decir e Aboriginals, a wordo mata y core for di a isla mas grandi door di militarnan di Europa. Despues di centares di aña e (grupo di) isla a wordo decolonisa y a drenta den e lazo di ‘Common Wealth di Australia’ na aña 1901, pues un pais autonomo, pero no independient, pa 120 aña.