Enquesta bou hobennan tocante COVID

Investigacion: muchanan europeo a experiencia les online y falta di contact social duro durante temporada di Covid.

Durante un enquesta cu a tuma lugar na October 2021 bou di 930 hoben di 7 pais Europeo, entre otro Hulanda, a sali afo cu e gran mayoria (77%) di muchanan entre 10 y 18 aña di edad a experiencia reto adicional pa cu siñamento. E edad cu tawata demonstra mas problema pa cu e lesnan di scol tawata entre e edad di 13-15 aña.

Falta di contact social

Claro cu tin beneficio na duna les online, pero e falta di contact social a wordo considera un problema pa 55% di e muchanan. Nan tawata sinti falta di por pasa tempo cu nan amistadnan. Algo importante pa e desaroyo emocional y social, specialmente den e grupo di 13-15 aña. Les online a resulta di trece basta problema di concentracion pa 48% di e muchanan/hobennan. E problema di concentracion a wordo detecta mas serca mucha homber cu mucha muher y tambe mas den hobennan di un edad mas halto. Comprencion di materia cu a wordo presenta via lesnan online, tambe tawata dificil pa 40% di e muchanan.

Papiamento

Na Hulanda y Europa, nos ta papia di muchanan cu mayoria ta wordo educa den nan idioma materno of e idioma cu ta wordo mas papia den e pais. Nos tur sa con e situacion ta na Aruba. Hulandes ta un idioma stranhero cu ta e idioma di instruccion na scol. Un herencia colonial cu ainda por trece un debate fuerte den pueblo. Censo Aruba di 2020 ta mustra cu na e hogarnan di famianan cu ta papia 1 idioma so na cas, 72% ta papia Papiamento. Hulandes ta esun mas abou cu solamente 10% di e populacion cu ta domina Hulandes so. Como cu Aruba ta un pais caminda mayoria hogar tin personanan cu ta domina 2 te cu 4 idioma CBS a laga su 6000+ participante scoge e dos idiomanan cu nan ta papia mas cu tur. Atrobe Papiamento a subi di 66% (Censo 2010) pa 72%, como idioma mas papia na tur hogarnan. Di e participantenan naci na Aruba, 92% ta prefera Papiamento y solamente 6% ta scoge pa papia Hulandes. Ingles cu 15%, Spaño cu 14% e logra lugar dos y tres.

Pues cualkier problema cu e muchanan Europeo a siñala, e problemanan di nos muchanan lo ta un poco mas grandi. Pa domina un idioma asina bon cu e no ta afecta e resultadonan escolar, lo bo mester papi’e y scuchele 7 dia pa siman y 24 ora pa dia. Un diferencia grandi entre muchanan cu problema cu e idioma Hulandes na Hulanda y muchanan cu problema cu Hulandes na Aruba.

6 biyon pa enseñansa

Otro cosnan cu no a wordo menciona relaciona cu scol, pero cu no a causa problema pa e muchanan tawata 1. Insuficiente espacio na cas pa por traha tranquilo sin wordo interumpi, 2. falta di laptop, computer of tablet y 3. aceso na wifi. Puntonan cu ya caba a wordo trec’i padilanti door di maestro y mayornan. A contrario di tur e problemanan mencioan, 58% di e muchanan a bisa cu nan no ta atrasa y 56% di a mayornan a sostene esaki. Sinembargo Gobierno di Hulanda na mei 2021 a aloca 6 biyon euro pa elimina e atraso educacional cu a muchanan a haya pavia di Covid. Lo duna e scolnan e oportunidad pa bin cu mas ora di les pa dia, guia pa grupo chikito y guia individual.

Gisele Sint Jago