Fondonan Europeo disponibel pa projecto di tur scol na Aruba

ORANJESTAD – Scolnan basico Pius X, St Franciscus y Sint Dominicus college ta e prome scolnan di Aruba cu conhuntamente como un consorcio, lo haya finansas di e Fondo Erasmus+ di Den Haag, pa cu e projecto ‘Habilidadnan Digital di siglo 21 pa Aruba’. E prome grupo di maestro, miembro di maneho y otro personal di e organisacion, tin planea pa den luna di oktober haci ‘job-shadowing’ na España. Asina Monique Laing-Breinburg a splica prensa di parti di e consorcio.

E projecto cu ta yama projecto ‘Habilidadnan Digital di siglo 21 pa Aruba’ ta enfoca riba e desaroyo di habilidadnan digital di maestro y personal y ta cana di 1 di juni 2020 te cu 31 di mei 2022. Den e asocisacion un grupo nucleo a wordo forma, cu mester percura pa parti e tareanan y e fondonan conforme e reglanan di Erasmus+ y tambe pa promove e projecto riba tur nivel, ambos den y pafor di e organisacion. E consorcio a scoge pa e projecto aki pa traha hunto cu compañero fiho den e mundo di enseñansa na España, Belgica, Suecia, Finlandia y Portugal y tin como meta principal ‘job-shadowing’ na un scol den exterior.  “E meta ta pa observa otro forma di duna les, caminda e maestro ta haya un rol diferente cu esun tradicional. E ta ofrece perspectivanan nobo riba variacion di tarea y crecemiento den enseñansa. E impacto di e projecto aki lo toca e alumnonan di e miembronan di e consorcio na prome lugar y na final tur alumno na Aruba”, segun Laing-Breinburg. “Cu e projecto akinos ta desea, como consorcio Arubiano, di trece un cambio na nos scolnan primario na Aruba y pone internalisacion riba e mapa. E oportunidadnan cu mobilidad educacional, cooperacion cu ta surpasa nos fronteranan y e chens pa personal por sigui profesionalisa nan mes, ta di suma importancia. E consorcio ta wak e projecto como un solucion pa masha hopi scol na Aruba pa emplea nan conosemiento y comparti cu e resto di e Isla. E scolnan ta haya e oportunidad pa desaroya nan mes, pa traha hunto, pa sostene, reenforsa y entusiasta otro y yega na un crecemiento caminda e identidad propio lo keda preserva. Nos lema ta: “Hunto ta miho cu bo so.”

Erasmus+ ta un programa di Union Europeo cu ta aloca fondo pa enseñansa, hoben y deporte. E commission Europeo a pone 30 biyon disponibel pa e añan 2021 te cu 2027 di cual por lo menos 25,9 biyon lo bay pa projectonan educativo y capacitacion. Tur scol na Aruba por pidi pa financiamento. Lo mester scirbi un descripcion amplio di e projecto. Pa mas informacion por acudi na www.erasmusplus.nl

Texto Original: Amigoe, 4 di september 2021.

Traduci pa G. Sint Jago

Abo tambe tin notica pa comparti? Tuma contacto cu nos redacion via: [email protected]