Diaranzon dia 19 di januari, un grupo di docente di Colegio Arubano (despues: CA) a welga dilanti di scol sosteni pa varios alumno. Nan no ta di acuerdo cu Stichting Voortgezet Onderwijs Aruba (SVOA, antes SMOA) a suspendi e rector di CA, Tim Croes, un dia prome y cu SVOA a prohibi pa trahadornan pa por haci uzo di e plataforma di comunicacion di e scol: Magister. E sospension y welga a cay memey di un siman di SE y CP y asina a causa incertidumbre cerca e alumnonan y nan mayor.

Despues di mas cu 40 ora den incertidumbre e mayornan e ricibi un carta firma pa e presidente Mr. Rosenstand, di SVOA, caminda a duna claridad tocante e CP y SE-nan di dia 19, 20 y 21 di januari. Caminda a wordi dicidi pa posponi e toetsnan cu 1 siman. y asina preveni di perhudica e muchanan. Mientras cu e docentenan di CA y directiva di SVOA ta purba di yega na un solucion pa cu e problemanan cu a surgi, despues cu a sospendi e rector di CA. Sindicato SIMAR, como defendor di e derechonan di trahadornan den e veld di ensenansa, ta intermedia door di ofrece un localidad y conseho pa ambos partido por sali for di e impasse cu a continua awe diahuebs dia 20 di januari 2022.

Un grupo di mayor a lansa un accion di collecta firma online y ta pidi e retiro di e directiva actual di SVOA. Mientras otro organisacion ta sali na defensa di e muchanan, cu un communicado di prensa cu SVOA a viola articulo 3 di e Tratado di Derecho di Mucha (IVRK) di Nacionnan Uni, mientras abogado di e rector ta bin dilanti bisando cu SVOA no tin un motibo valido pa a suspendi e rector.

Locual ta importante, ta pa tur esnan involvi y esnan cu ta traha cu muchamenor di edad pone atencion na e tratado akiriba menciona pa semper cumpli y traha na bienestar di nos muchanan y sina di e situacion cu a surgi pa esaki no wordo ripiti den un of otro forma. Den e epoca aki di Covid-19, e generacionnan cu ta lantando tin biaha ta sinti cu nan falta un perspectiva pa cu nan futuro. Como adulto e ta keda na nos pa sigui apoya nan y duna nos muchanan e sosten cu nan merece y mester pa por sali for di cualkier situacion penoso y no laga nada stroba nan.