Hulanda: Docente cu a meld AO pa 2 aña mester paga 36.000 EURO bek!

Docente cu tawata A.O., pero trahando na un otro scol, mester paga 36.000 EURO bek. 

Un maestro di Aardrijkskunde di 43 aña, cu pa dos aña largo a cobra uitkering pavia cu el a meld AO, mester paga e salario y otro gastonan cu el a ricibi bek na e fundacion educativo Esprit di Amsterdam.

E docente cu tawata traha part-time na dos scol a splica huez cu e carateristica di su trabou na e otro scol tawata completamente diferente, door cu e no mester a traha hunto cu otro coleganan, locual tawata problematico na e otro scol. Ademas cu e orarionan cu e tawata traha pa scol A no tawata cay riba e mesun momentonan cu e oranan trahando pa scol B. A wordo  argumenta door di eiser, cu su doño di trabou por a haya sa, atravez di e dokter di compania, cu e tawata trahando na un otro scol. Cu otro palabra, e no mester a informa su doño di trabou personalmente.

Pa dos aña largo e docente a ricibi respectivamente 100% y 70% di su sueldo, mientras e tawata A.O. y trahando na un otro scol. Tambe el a acepta fondonan pa cursonan y guia pa reintregracion bek den e mercadeo laboral di scol A caminda el a meld ziek. Huez no a haya esakinan motibonan valido di e docente, pa keda sin informa su empleador directamente tocante di e situacion cu en realidad e tawata “part-time A.O”. Un di e principionan di Ley Laboral ta ‘goed werknemerschap’ y ‘goed werkgeverschap’. Locual ta encera cu ambos ta informa otro debidamente di cualkier situacion cu tin di haber cu nan lazo laboral. Huez a dicta cu tur e placa ricibi durante e dos aña, mester wordo paga bek na e Fundacion Esprit.

Redaccion: E hecho cu e trabou cu e docente tawata haci diariamente na scol B tawata cay bou di e mesun funccion cu e trabou na scol A, lo tawata e motibo cu e flie aki no a subi. Ademas, un veredicto na fabor di e trahador lo crea un situacion indeseabel, caminda hende lo traha part-time pero wordo paga full-time, mientras nan ta bisa cu e lugar di trabou A ta haci nan malo y trabou B ta bon. Un miho solucion lo tawata si e docente lo a acerca su doño di trabou pa hunto nan yega na un solucion, bisando di principio cu e ta trahando na scol B caba. Por a scoge pa busca un otro scol pa despues tuma su retiro.

Fuente: ‘Zieke’ leraar die elders werkte, moet 36.000 euro terugbetalen | RTL Nieuws