Hulanda falta casi 10 mil maestro y docente pa aña scolar 2022/2023.

Aunque tur aña mas cu cuater mil (4.000) maestro ta caba e instituto pa maestro di scol basico PABO, e falta di maestro nacionalmente ta sumamente grandi. Pa scol basico tin aworaki 9.100 vacatura full time habri na Hulanda. Na scol secondario un cantidad di  1.700 fte. En realidad e cantidad ta mas grandi, door 40% di tur maestro na Hulanda ta scoge pa traha part time, door cu e pression y peso di e trabou. E deficit aki lo bay tin un effecto grandi riba nos isla tambe.

 

Gobierno di Hulanda a pensa riba cuater manera pa baha e deficit aki:

• Haci e profesion mas atractivo, door di baha e pression di e trabou y hisa e pago. Un inversion structural di 1.5 biyon ta wordo inverti door di Hulanda cu a wordo firma den e ultimo ‘Onderwijsakkoord’ of Acuerdo di Enseñansa.
• Mas ‘zij-instroom’. Gobierno di Hulanda ta pone mas placa disponible pa profesionalnan cu ya tin un educacion riba nivel di HBO of mas halto, pa paga pa nan studio pa nan por logra haya nan diploma como maestro, dentro menos cu dos aña.
• Hisa e cantidad di inscripcion na PABO y Lerarenopleiding door di mehoracion, intensivacion y personalisacion di informacion na scol secondario, den e ramo di ‘studie y beroepskeuze’. Escogencia di estudio y profesion. Mas cooperacion entre e institutonan y e scolnan. Un investigacion a trece padilanti cu tin scolnan di signatura Christian cu tin como 20% di nan graduadonan ta scoge pa bay studia pa maestro, mientras den Randstad tin scolnan cu tin 0% cu ta scoge pa studia pa bira maestro.
• Traha ‘overtime’. Ta investigando con pa logra pa mas docente y maestro scoge pa traha fulltime enbes di part time. Un di e obstaculonan ta e orarionan di trabou. Ta pensa di ofrece mas flexibildad di orarionan di trabou, pa maestronan mes tambe por hiba nan propio yiunan scol.

“Leerlingen, ouders, leraren en schoolleiders, iedereen merkt het. Het tekort aan leraren en schoolleiders is urgent, daarom trekken we alle registers open. Ook nieuwe, onorthodoxe maatregelen zijn nodig. Minister Dennis Wiersma roept scholen op mee te doen aan een proef om een bonus te geven aan leraren die hun contract willen uitbreiden.”

Akiriba por lesa cuanto pression tin pa soluciona e problema di falta di maestro. Na e momento aki, Gobierno di Hulanda ta contempla di paga maestrnan un bonus si nan dicidi pa bay traha fulltime enbes di part time. Esaki a wordo cancela algun tempo atras door di un autoridad, e Colegio di Derecho Humano, a duna un conseho negativo, door cu nan a wak esaki como discriminacion a base di e cantidad di ora cu un trahador ta labora. Sinembargo, Gobierno di Hulanda no ta wak un otro solucion y a dicidi di sigui cu nan plan pa duna un bonus na esnan cu ta labora fulltime. Na e momento aki tin deliberacion pa wak con halto e bonus aki lo bira. Ya caba e salario pa un maestro na Hulanda cu a caba di gradua, ta 4000 florin netto, cual ta mas halto cu esnan cu tin 15 aña ta labora na Aruba. Ademas e salario di un maestro por subi te cu 14.000 bruto pa luna bruto riba e nivel di scol basico a base di experiencia y experticio. E discrepancia entre salario pa maestro den Reino Hulandes a bira sumamente grandi. Asina alarmante tambe, cu como pais nos mester percura pa no perde nos mesun maestronan.

 

Redactie

GBMSJ