Articulo original cortesia di masnoticia.com

E Nationaal Onderwijs Congres Aruba a wordo organisa Online e aña aki pero manera semper cu e mesun inspiracion, motivacion, tools valioso pa docente, interaccion y teambuilding pa tur den kleuter, basis y middelbaar onderwijs cu ta desea di sigui desaroya.

Ta asina cu na 2018, e directora saliente di SKOA sra. Josette Daal a start cu e iniciativa akinan caminda cu SKOA hunto cu Raad van Toezicht a pone e prome piedra pa un cambio den enseñansa pa scolnan di SKOA pa duna bek na docentenan e conocemento cu por bay traspasa over na nos studiantenan. Na 2018 hunto cu Rolf Groep di Hulanda, SKOA y Raad van Toezicht cu sra. Daal na cabes e tempo ey a bini hunto y lansa esaki cual pa Aruba tabata un trend. Pasobra normalmente bo ta haya cursonan den pasado cu a wordo duna sea door di Directie Onderwijs, of Minister di Enseñansa pero esaki tog tabata algo totalmente diferente camind ta huur Renaissance y na cada area ta wordo parti cu diferente curso cada pasa 45 minuut pa docentenan. Esaki a wordo haci dos aña largo den e ‘normal bieuw’ anto e aña akinan e programa mester a wordo totalmente reconfigura.

“E caminda aki cu SKOA a tuma na 2018, pa nos e ta e caminda di bay si nos kier mira cu nos lo bay ta sostenibel den enseñansa pa cu nos scolnan”, segun Anuesca Baly, directora di SKOA.

Na 2018 a cuminsa cu un dia cual tabata e congreso, cu full e siman largo diferente cursonan pa docente, e aña akinan tin e mesun idea pero tur cos ta digital. Door di e pandemia naturalmente bo no por bini cu un grupo grandi hunto, dus SKOA a organisa esaki e biaha aki na e scolnan mes. SKOA a pone 18 scol disponibel caminda cu tur empleado di kleuter te cu voorgezet por a escohe diferente curso. Den bario di Oranjestad por ehempel tin tres caminda cu tin grupo ta sinta den diferente klas pa sigui e workshops for di 8’or di mainta te cu 12.30 di merdia, cada 45 minuut.

E interes ta hopi grandi y docentenan ta hopi motiva segun SKOA pasobra e temanan cu a wordo escohi hunto cu partner Rolf Groep. Temanan cu no solamente ta brinda mas conocemento, pero tambe mirando e situacion di COVID19, tin curso ta cubri e parti di con bo ta bay trata cu e situacion den bo klas, con bo ta uza ipad den klas, importancia di klas cultuur, con bo ta bay maneha e studiante den klas cu a experiencia situacion fastioso pa motibo di COVID19.

“Pasobra nos tur den un manera of otro ta bao di un stress, dus tin diferente curso na con pa trata cu esey”, segun sra. Baly. Tin Reken Onderwijs, Taal Onderwijs y mas pa cada nivel. E congreso a inicia awe 27 di October y e resto di siman lo tin cursonan andando parti merdia unda docentenan por bay Online riba SKOA Academy y sigui e cursonan cu nan ta desea.

Tin diferente curso cu lo ta obtenibel pa henter aña largo, docentenan por log in via email adress di SKOA pa e diferente cursonan, webinar, e-learning y mas curso pa atende. SKOA ta di pensamento cu un inversion den conocemento di docente ta saca probecho pa nos muchanan den pais Aruba cual ta hopi importante.

Docentenan no ta haya certificado pa esaki pero segun SKOA den e mesun rosea akinan cu ta uzando SKOA Academy,  ora nan atende un curso esaki ta wordo nota den nan file cu ta bira parti di nan CV.

SKOA a trece dilanti cu pa aña tur docente mester por a sigui minimo 3 curso pasobra esaki ta e parti cu bo ta inverti den bo mes como docente. “Un docente cu ta inverti den su mes ta inverti den nos scolnan cu nos muchanan. Esey ta e parti caminda cu e ta wordo registra den file di docentenan cu nan a sigui tal curso, y por mira esunnan cu no a haci nada nos ta pusha nan den un manera pa nan por participa”, sra. Baly ta splica.

E ta henter un aña largo cu e cursonan aki ta obtenibel pa docente, bo tin 10 luna di scol den un aña y tres oportunidad caminda bo por sigui un curso pa enrikece bo mes como docente.

---

Pa mas fotos y impresionan bishita nos Facebook Event Page.