Kico nos por spera den Educacion den aa 2022 y mas padilanti?

Opinion: “Tres palabra cu lo domina e conversacionnan den 2022: metaverse, NFT y avatar.”

Tempo a cambia. Nos a acepta e cambionan di technologia, caminda awendia tur mucha di 10 ana bay ariba ta cana cu un cellular enbes di comparti un telefono, cu ta pega na muraya, cu henter famia. Nos a acepta cu bo no mester warda 2 siman pa un carta yega cerca bo famia den exterior y un otro 2 siman pa e contesta yega back cerca bo. Nos a acepta cu nos no mester cumpra un excyclopedia pa haya sa mas di locual a pasa y to conosi rond mundo, pero cu nos por haya varios contesta riba cualkier pregunta riba mundo y haya un miyon hits den menos cu 0,000000000001s. Nos ta cla pa drenta den un era digital nobo? Caminda informacion no ta oro mas, pero e experiencia?

 

Experience Age

Despues di apenas 25 ana di existencia di world wide web, ya caba nos a laga e era di informacion. ‘Information age” nos tras y a progresa pa e era di experiencia. “Experience age”.  Palabranan manera ‘metaverse’, ‘avatar’ y ‘NFT” lo bay bira algo normal den nos vocabulario. Di cual NFT, Non-Fungible-Token, ta un artefacto cu no por wordo re-emplasa. E NFT mas caro pa aworaki ta e collection ‘Beeple’s Everydays’, cu ta un collection di arte digital cu a wordo bend’i pa $69 miyon. Esey lo wordo splica un otro dia. E experiencia ta central den e 25 ana nos dilanti. Locual nos mester realisa, ta cu e balor di informacion a baha drasticamente y awor e oro nobo ta experiencia.

 

Experiencia Aumenta

Imagina bo cu bo por topa cu henter bo famia na un lugar digital cu boso mes a traha hunto, caminda bo por sinta hunga domino cu bo yiu cu ta na Canada, bo ruman na Hulanda, bo tanchi na Boneiru y bo welo na Colombia. Boso por sinta conversa, wak e serie hunto manera ta den sala na e cas di bo soño bo ta. Un lugar of universo virtual asina, nan ta yama un metaverse. Tur hende ta presenta nan mes den e forma di un avatar, un popchi digital, ora nan bisti nan headset y ta drenta den un mundo digital cu ta laga nan tin un experiencia hunto, caminda den e mundo virtual bo no ta bo so, pero cu esnan cu bo a invita y duna permiso pa drenta den bo metaverse. E ta eigenlijk mescos cu un zoom meeting, pero den 3D y 360 graden. Un experiencia nobo y aumenta, di berdad. Lo tin beneficio eynan, pero tambe desventahe cu nunca lo por re-emplasa un encuentro social y real.

 

Enseñansa den 2022+

E no ta imposibel pa imagina bo cu e era di experiencia lo trece cambionan den nos ensenansa. Habilidad digital, material y conosemento lo keda central. Mientras mundo ta cambia na un manera rapido, tin cierto cosnan cu no lo cambia, pasobra esey ta bay dura miles y miles di aña: e essencio di e ser humano no ta cambia, nos celebro no ta cambia, nos spiritu no ta cambia. Tur e ‘toolsnan’ aki, nan no por cambia e experiencia di ta un ser humano. Pa uza idioma pa comunica, sea verbal of non-verbal. Pa scucha y relata na e experiencia di bida di un persona y demonstra compassion. Y mas cu tur, e realidad di nos muchanan y hobennan ta keda cu e idioma Hulandes lo no ta hiba nan hopi  leeuw den futuro mas.

Ora bo pasa door di top 20 di paisnan cu e miho sistema di educacion. Tur pais ta ofrece nan idioma materno como idioma di instruccion. VS, Zweden, Singapore, Zweden, Letland, Zuid-Korea… ningun di nan a sigui cu e idioma strahero como idioma di instruccion, pasobra nan ta compronde, cu pa bo laga un pais bay dilanti, bo mester yuda bo pueblo progresa den nan educacion.  Mi por imagina mi cu pronto nos hobennan lo studia atravez di un realidad virtual, caminda nan ta sinta na cas, bisti nan VR headset, drenta college den forma di un avatar y ta sigui les na Merca, Zuid Korea, Singapore, pero for di Aruba mes. Asina tur studiante por haya un educacion den e ramo cu ta interesa nan y cu no ta laga nan ta limita na studia na Hulanda, Canada of Aruba so. E ta eigenlijk mescos cu un zoommeeting, pero toch hopi diferente… e ta un experiencia den 3D y 360 graden y caminda bo por comparti e experiencia aki cu mas persona na e mesun momento, pero traha e espacio cu bo ta den. Un experiencia differente, di berdad. A bira tempo pa nos tambe pone atencion na e experiencia cu nos kier duna nos muchanan y hobennan na scol y ki idioma lo beneficianan mas pa cu nan futuro. Un futuro sin limite di frontera natural.

 

GSJ