Merel van Vroonhoven, un docente Special den Educacion Special.

Na december 2020, Merel van Vroonhoven (naci na Blaricum Hulands na 1968) a dicidi di laga su trabou y posicion halto den sector priva atras y cambia su profesion pa esun di maestra. El a aplica pa drenta den e mundo di enseñansa, pa bira un juffrouw di scol basico special, na e edad di 52 ana.

Ocho aña prome cu esey, el a wordo premia como ‘Business Woman of the Year 2012’. Su liderazgo, hiba den un forma inclusivo, semper a wordo elogia. E tawata administrador di NN (Nationale Nederlanden) un compania di seguro internacional, administrador di NS (Nederlandse Spoorwegen) y administrador reguladora di e directiva di AMR (Autoridad  Mercadeo Financiero). Un decision drastico asina, pa laga sector priva y bay traha den enseñansa, no ta hopi comun. Sinembargo, e hecho cu tin asina un gran falta di docente awendia na Hulanda, a causa cu el a dicidi di duna su parti pa yuda enseñansa.

Mientras cu e ta pasa door di e trajectorio di ‘Zij-instromer’, aña pasa el a cuminsa duna les 3 biaha pa siman den un zesde klas di un scol special. El a bira e colega di e maestro cu den pasado a duna su mesun yiu les. Su yiu tambe tawata un mucha cu tawata tin necesidad di atencion mas amplio, cu e lo logra haya den un klas cu 30 mucha y solamente 1 docente. Desde e tempo ey caba, Van Vroonhoven a splica, e deseo pa contribui indirectamente pa cambia e systema y e pensamento di ta un maestro, tawata interesa Sra Van Vroonhoven caba. E ta admiti cu den bes en cuando e no ta compronde pakico e muchanan mester siña cierto materia, pero e sa tambe, cu e no a haya tempo pa wak henter e curiculo. SInembargo, su meta principal ta pa no huzga un mucha a base di testnan so. E ta di opinion cu mescos cu den un negoshi of den Sociedad, bo no por midi tur factor, bo no por midi e capacidad di un mucha solamente basa riba e testnan cu ta wordo haci. Semper tin mucha cu ta desaroya nan mes na un manera mas lihe cu otro. Pues e test lo por duna un otro resultado 6 luna despues.

Na e mesun momento cu el a cuminsa traha como maestro (zij-instromer), el a haci anotacion di su experiencianan. Tur siman e ta skirbi nan den su column, cu awor a sali den e forma di un buki cu e titulo: “De Stap – Hoe de weg naar de top mij naar het klaslokaal leidde.” El Paso – Con mi caminda pa e top a hiba mi dilant’i klas.” E ta splica di e proceso prome cu el a tuma e decision, kico el a experiencia y kico su opinion ta te awo. Ya caba e ta uza e terminologia di educacion, caminda ta papia di OO/BO/BB/OB. E OO ta para pa Onbewust Onbekwaam. Caminda cu bo no ta conciente kico e habildadnan ta cu bo no ta domina ainda. Despues di tempo durante bo studio, bo ta haya sa kico bo habilidadnan mester ta y bo ta conciente cu bo no ta domina nan ainda. Bo ta conciente di bo incapacidad. Bewust Onbekwaam. Eynan e training ta bay ta mas effectivo. Despues di training, bo tin a habilidad, pero ainda bo ta conciente y ta pone mucho attencion riba e hecho cu bo ta eherciendo e habilidadnan aki bon of cu bop or miho. Esey ta wordo yama Bewust Bekwaam. Pa na final bo domina un habilidad den e forma, cu bo no ta ni conciente di dje mas. El a bira un parti di bo habilidadnan professional cu ta wordo eherce automaticamente: Onbewust Bekwaam.

Cu su network Sra Van Vroonhoven a logra bira miembro di un commission di Minister di Enseñansa di Hulanda pa yuda pa investiga unda e problema sinta, cu hende no ta scoge un studio como maestro mas. Asina tambe e ta purba di haci un diferencia pa comunidad. Su meta principal, ta pa keda maestro te na su pensioen.

 

GMSJ