19 november 2021

Hulanda – Pavia di e cantidad halto di infection cu Covid-19 na Hulanda, scolnan secondario, MBO, sindicatonan y Onderwijs Raad, ta haya nan mes enfrenta cu varios problema y decision dificil tocante e CTB (Corona Prueba di Admission).

„Medidanan contra Corona ya caba a causa un impacto grandi riba e motivacion di studiantenan den MBO. Nos ta premira cu ora Gobierno bin cu mas regla, cu e motiviacion di studiante pa sigui un studio lo baha mas ainda.” Esaki ta e declaracion di varios organisacion den Ensenañsa manera e sindicatonan AOb y CNV-Onderwijs. E proposicion di e Outbreak Management Team (OMT) di Hulanda, pa exigi pa tur studiante mustra nan CTB pa por haya permiso pa drenta e edificio di scol, ta uno cu ta trece problema riba varios tereno, incluso uno hopi practico: No tin sufficiente personal pa controla esaki.

 

Logistica di CTB

Na e momento aki e protocol di OMT pa MBO scol ta: bisti masker den gang di scol, tene distancia y scol no tin mag di tin mas cu 75 studiante den un collegezaal of lokaal. Hulanda tin 63 scolnan di MBO, 800 diferente estudio certifica y mas cu 500.000 studiante registra. Locual ta un promedio di 8000 studiante na cada scol cu lo mester wordo controla tur mainta si nan QR code ta valido si of no. Esaki lo causa filanan largo cu consecuencia cu lesnan lo cay afo pasobra e studiantenan no por yega den les na ora. Instancianan concerni a manda un carta na e Gabinete Hulandes, cu keto bay ta demisionario desde maart 2021, cu nan preocupacionnan pa cu e efecto negativo di introduccion di CTB/ QR Code na MBO.

 

Grado di vacuna

Studiantenan di MBO ta un di e gruponan demografico cu un grado di vacunacion mas abou, mientras cu nan por infecta of wordo infecta mas lihe, pavia di e frequencia y extenciedad di nan contactonan social. Ultimo tempo, di e cantidad di persona cu a wordo infecta, 50% tawata hoben, ‘tieners en twintigers’. Aunque nan no ta bira hopi mali cu simptomanan grave, toch e ta hisa e cantidad di personanan cu mester wordo hospitalisa. Instancianan ta prefera pa Gobierno bin cu iniciativanan pa e studiantenan vacuna nan mes, enbes di un protocol mas estricto pa tur.

 

Quarantaine di klasnan na Scol Secondario

Scolnan secondario na Hulanda tambe tin hopi mas problema awor cu a cantidad di hende infecta cu e virus a subi drasticamente, te cu el a kibra e record di December 2020. Mayoria biaha henter e klas ta wordo manda den quarantaine, despues di comunica cu GGD (red: locual ta nos DVG). Lesnan ta sigui online mientras e muchanan ta den quarantaine. Un promedio di 9.8% di alumno di scolnan secondario (mas o menos 2000 alumno pa cada scol), lo mester keda cas pa un temporado di minimo 5 dia si nan haci test na GGD y maximo 10 dia, si nan no kier haci e test.

 

Covid test Autonomo/ Covid zelf test.  

Locual ta algo cu nos no a yega di wak na Aruba ainda, ta cu e directia di school mes ta duna e alumnonan un ‘zelftest.  Un test cu ta mustra bo den un paar di minuut si bo ta positive pa Covid si of no. E zelftest e scolnan ta haya gratis y nan ta distribui esaki bou di e alumnonan. E muchanan ta haya 2 pa 3 test autonomo pa hiba cas y uza ora nan sospecha cu nan lo por ta Covid positivo. Un sistema cu no ta traha 100%, pasobra tin biaha e mucha cu ta niester y tosa ta haci e zelftest y  ora su test sali negativo e ta bay scol toch.

 

Scirbi pa Gisele Sint Jago