Situacion social-economico ta e factor mas determinante pa exito academico.

Investigacion door di Inspectie Onderwijs na Hulanda ta demonstra cu te ainda e nivel social economico di e famia ta determina e nivel y exito academico di e mucha. Por ehempel. Justin y Roddrick ta dos mucha cu e mesun intelligencia y e mesun score di Cito. Tur dos ta haya e conseho VMBO (Mavo). Sinembargo, den e caso di Justin, su mayornan tin un educacion halto y nan ta pone pression riba e maestro. Pakico? Pasobra nan ta na haltura cu e conseho di scol basico no ta uno obliga pa sigui, Mientras e mayornan di Roddrick cu no tin conocemento di e systema di educacion, pasobra nan mes no a yega di studia, ta confia y respeta e decision di e maestro sin mas.

 

MBO

Na e momento cu Roddrick yega na VMBO (Mavo) tin tiki oportunidad pa e por studia riba un nivel mas halto. Mas abou si tin, pero no mas halto. Mientras Justin, cu a bay Havo, ta haya e oportunidad pa haci cierto materia riba un nivel di VWO y ta haya retonan extra. Cu 16 ana, Roddrick un bon studiante, mester dicidi si kier bay Havo pa dos ana of MBO (EPI) pa cuater ana. E tin un poco miedo di faya, e la tende di varios hende cu e cambio di Mavo pa Havo ta dificil. E ta dicidi di haci un studio riba nivel di MBO pa despues bay HBO.

 

Bijles

Justin a haya bijles tur e ananan cu e tawata bay Havo y tambe examentraining priva. Su mayornan tawata tin a posibilidad financiero pa yudele pa e por a surpasa e problemanan academico cu el a encontra. Asina e ta logra caba Havo cu 17 ana. Su diploma di Havo ta cualifica sin mas. pa e wordo acepta na un HBO.

 

Debe di studio of traha?

Ora cu Roddrick tin 20 ana e a caba su MBO e ta pensa pa bay HBO ainda. Pero su diploma di MBO no ta lagele cualifica automaticamente pa tur HBO. E mester haci un test di Hulandes. E mester motiva pakico e kier bay HBO. Hopi trabou e ta pensa. Su mayornan no por dunele conseho, pasobra nan mes no a studia riba e nivel ey. Tambe amistadnan ta papia di studiantenan cu a studia riba nivel di HB y nunca a caba cu nan studio y cu awor tin un debe di studio astronomico. E ta dicidi di bay traha, mescos cu e gran mayoria di studiantenan di su MBO.

 

Estudio paga

Ora Justin tin 20 ana e ta den e penultimo ana di HBO. E falta un ana so. Y su mayornan ya caba a bisele cu 21 ta hopi jong pa bo bay traha, pues e ta pensa di haci Universidad despues di su HBO. Si su mayornan no a spaar pa paga su studio p’e, nan lo splikele, cu ora e caba su Master, su salario lo ta mas halto cu un studiante cu a caba MBO of HBO. Caminda e lo no ni sinti e peso di e debe di estudio.

 

Diferencia di situacion social-economico

E hecho cu te awe e diferencia di oportunidad cu tin entre mucha cu tin e mesun capacidad, ta wordo determina door di nan situacion social-economico ta un problema na Hulanda cu ta birando mas grandi enbes di baha. Algo cu nos tur na Aruba tambe por imagina nos mes. Caminda no bo inteiligencia y educacion, pero e famia cu bo a nace den dje ta determina bo futuro. Mientras e idea original pa bin cu scol basico y despues secundario, semper tawata pa duna tur mucha e oportunidad pa determina nan mesun futuro.