SKOA cu Exitoso Congreso Nacional di Enseñansa den Caribe 2021

EXITOSO CONGRESO NACIONAL DI ENSENANSA DEN CARIBE ORGANISA PA SKOA.

Pa e di cuater aña consecutivo SKOA a tene nu Congreso Nacional di Enseñansa riba diamars dia 2 di november 2021. Despues cu na 2020 esaki mester a tuma lugar online, e aña aki a scoge pa haci uzo di e mesun format pa motibonan practico, economico y pa preveni un evento di superspread di e Covid-19 virus. Como resultado, e congreso aki, cu ta wordo yama un congreso nacional, door cu SKOA ta e fundacion educativo mas grandi na Aruba, a resulta di a bira uno internacional, door di participacion di maestronan di nos islanan ruman Boneiro y Curaçao.

Despues di e apertura cu e signatura catolico, un palabra di bon bini di representante di Raad van Toezicht di SKOA, Mr. Gino Goeloe y un discurso di directora di SKOA Sra. Anueska Bayley, nos maestronan por a login riba e plataforma online pa participa na 5 ronde caminda varios differente workshop tawata wordo ofrec’i, parti riba henter dia te cu 3’or di atardi. Na e mesun momento tambe tawata tin tarea specialisa pa e directivanan di scol.

Por a parti e topiconan di e tareanan den 3 tema, aunque algun presentacion tawata tin elemento di mas cu un tema:

  • Cuido di mucha, mayor y maestro den ensenañsa
  • Organisacion di les combina cu aplicacion di tecnologia digital
  • Habilidadnan di siglo 21.

Riba e dia di estudio aki, tawata tin atencion special pa e fenomeno di ‘burn-out’ cual den e sector di ensenañsa ta frequencia mas hopi cu den otro sector; 27,4% compara cu un average di 17%, a base di e resultadonan di e investigacion: ‘Nationale Enquête Arbeidsomstandigheden’ door TNO en het Centraal Bureau voor de Statistiek, 2019).

 

Burnout

Durante un presentacion plenario , keynote speaker di Belgica, Luk deWulf, autor di entre otro e bukinan ‘Kies voor je Talent’ y ‘Stop Burnout’. Luk DeWulf, su bukinan a wordo republica pa 22 biaha caba. Ademas e ta duna differente workshop pa reconose y desaroya talento den mucha.  De Wulf, cu a gradua den Pedagogiek na e Universidad Catolico di Leuven (BE), a comparti su definicion di e concepto di talento. Tambe el a splica e proceso di cooperacion necesario, pa por reconose, preveni of sali for di un Burnout. Akibou algun punto interesante:

  • Esnan cu ta haya un burnout, no ta personanan cu no sa traha duro, a contrario. Nan ta na haltura di tur nan responsabilidadnan.
  • Un burnout semper tin di haber cu trabou, caminda un depression lo por tin di haber cu tur otro areanan di bo bida.
  • Bo talento lo por bira bo debilidad, ora cu bo ta na caminda pa un Burnout, door cu bo ta pasa over di bo mesun fronteranan te ora bo curpa mes bisa: Ta Basta!
  • Un coopracionon, manager of colega cu por reconose e signalnan cu su co-trahador no ta funciona optimalmente mas, lo por yuda e trahador aki, enbes di reaciona riba su erornan cu feedback negativo, cual ta haci e situacion piho.
  •  Tambe e falta di un perspectiva den un carera of riba un cambio desea pa cu e persona su trabou den futuro, ta un causa grandi di burn-out.
  • Caminda den otro sector por cambia di trabou of sector facilmente pa elimina e causa na trabou, den ensenansa e docente of maestro lo mester bay bek caminda el a bira malo, sin cu algo a cambia of wordo soluciona.

 

Tarea di DG-Experto a sobresali den ‘Digital Experencial Learning’. 

Cada tarea tawata uno interesante, aunque algun tawata sobresali door di ta mas interactivo, of adapta pa e situacion na Aruba of cu un manera di traha mas activo y un nivel mas avansa. Un ehempel con e lesnan di awendia por cumpli cu e era di experiencia, tawata e tarea di SKOA DG-expertonan Jane, Ruzischka y Mario. Esnan cu a click riba nan curso, no a haya chens ni pa gaap. E tarea tawata uno cu a laga e maestronan experiencia kico e alumnonan lo por experiencia ora e maestro haci uzo di e tecnologia di awendia. A cuminsa cu preguntanan interactivo y despues a laga e maestronan experiencia e les. Aplicando soft skills (traha den grupo) , uzo di ZOOM riba un nivel mas efectivo, uzo di cellular pa scan QR codes pa asina yega na un formulario riba Google forms, despues uza QR code pa yega na un website manera por ehempel Kahoot, caminda mester a contesta preguntanan cu tawata uza multi media, pa asina descrubi un code secreto. Tur esaki pa por a sali for di un ‘Virtual Escape Room’ den un tempo stupila. Un les cu a sinti manera un aventura y e participantenan lo no lubida facilmente.

Habilidad di era 21

Pa e ultimo 5 aña caba, mundo moderno a cambia di e ‘Era informativo”, pa e ‘Era di Experiencia’. A base di diferente apps nos por experiencia mundo na un otro manera. Sea e ta un app pa por reconose tur strea na cielo of un app pa wak con un sofa di IKEA lo pas den bo cas. Para dilanti klas y splica kico ta skirbi den e buki, no ta sufficiente interesante mas pa e generacion di awe. Nan kier wak, scucha, sinti y soluciona problemanan cu nan mesun habilidadnan. Educacion ta forma pa wordo experiencia riba un manera digital, 3D of 4D cu AR (Augmentated Reality) of VR (Visual Reality) enbes cu ta uza tecnologia pa informa e alumno via 2D (TV). Cu materialnan ‘old school’ tambe por experiencia e concepto di computing, cual ta uno di e habilidadnan di ciglo 21. Mester djies cambia e manera di wak un material, pa haya un aplicacion nobo cu ta pas cu e habilidadnan di e era 21. Claro cu tecnologia tambe ta duna oportunidad pa desaroya bo habilidad como maestro y pa yuda bo alumnonan desaroya nan mes.

 

Prome lustrum: 1 di november 2022

E fecha di e siguiente Congreso Nacional den Caribe di SKOA ya caba ta conosi y lo wordo organiza dia 1 di november 2022. Riba e dia aki lo celebra e di cinco biaha cu ta organisa e congreso educativo, cu tur ana ta bira mas grandi y di un calidad halto. SKOA, bou liderazgo di Sra Anuesca Baly, ta yama danki na tur maestro cu a participa na e congreso y ta invita nan pa otro aña tambe.

 

Gisele Sint Jago