Pa ta exitoso den bo estudio, bo mester planea dilanta. Mayornan cu tin yiu na Mavo y cu e yiu kier sigui studia na Hulanda despues di Havo of EPI, nan mester pone nan mes na haltura di e pasonan cu mester wordo tuma. Un di nan ta cu mester tuma contacto cu e departamento di Estudio na Hulanda cual ta DUO (Dienst Uitvoering Onderwijs).

Pa duna miho servicio na e studiantenan y nan mayornan, DUO ta bishita tur cuater isla e aña aki, entre oktober y december 2022, pa brinda informacion den un forma personal. Esaki ta e di dos biaha e aña aki cu DUO a cuminsa cu e servicio door di instala officinanan temporal y bishita tur e islanan den Caribe Hulandes. E siman aki ami mes mi a bishita e officina hunto cu mi yiu. Den e edificio di John F. Kennedy, di departamento DEA, nos a topa cu un trahador di DUO. E tawata masha servicial. El a mustra riba cua website por haya informacion specialmente pa studiante  (y nan mayornan) di e parti Caribense di Reino Hulandes: www.duo.nl/antillen. E website ta den e idioma Hulandes y Ingles.

Na prome lugar nos a wordo splica cu e futuro studiante mester aplica pa un DigiD, prome cu por inscirbi pa cualkier estudio. Como recomendacion nos a haya tambe pa si tin famia na Hulanda pa uza e adres na Hulanda pa asina por ricibi cierto documento mas lihe, den menos cu 3 dia. Ademas nos a haya informacion y un demonstracion di e formulario cu nos como mayor mester yena, tocante nos entrada di trabou anual. Parti di e splicacion tambe tawata cua formulario bo mester, si por se caso e yiu tin contacto solamente cu un mayor so, of si e mayor(nan) no por of no kier contribui na e estudio di e yiu.

Nos a wordo informa tambe, cu Gabinete Rutte IV ta den e proceso pa introduci e ‘studiebeurs’ bek. Cual ta encera, cu si bo tuma un fiansa di estudio y bo ta caba bo estudio di HBO of Universidad den menos cu 10 aña, bo no mester paga e placa di e studiebeurs aki bek. Un tremendo iniciativa, cu probablemente lo bin na vigor pa e aña 2023-2024. E trahador di DUO a conseha nos pa inscirbi di biaha, cuminsando cu aplica pa bo number di BSN y despues e DigiD.

Ademas, e website di DUO ta asina avansa, cu semper bo yiu por adapta, cambia of stop tur fiansa di estudio: ‘basisbeurs, aanvullende beurs’, mensualmente, pa asina keda den control di su debe di estudio of limita di haya un debe di estudio astronomico. Por ehempel, ora e tin tempo pa traha, e luna ey e lo mester di menos aanvullende beurs. Ora e tin tentamen, e por adapta pa e por tuma su tempo pa concentra riba su estudio. Of ora e ta bin Aruba bek cerca su mayornan durante su vakantie, tambe e por baha su fiansa di estudio temporalmente. Un cambio cu ta haci e producto di fiansa pa estudio mas facil pa maneha.

Un otro informacion cu nos a haya, ta cu desde 2018-2019 Hulanda a introduci un rebaho di College geld cu 50% pa tur studiante di e prome aña cu ta inscirbi pa studia na un ‘HBO of Universidad’ pa prome biaha. Enbes di mas o menos 2200 Euro, e Collegegeld ta 1100 Euro pa e proximo aña. Esaki a keda prolunga durante y tambe despues di Covid. Pa e aña di estudio 2023-2024 esaki lo keda na vigor. Esnan cu ta studia na PABO pa bira meneer of juffrouw di scol, ta haya un descuento di 50% di nan Collegegeld pa e prome y e di dos aña. Asina ta purba di baha e drempel pa cuminsa cu un estudio, di cual e debe di estudio ta stroba un cantidad grandi di hoben pa sigui studia despues di caba nan MBO, Havo of VWO, pero tambe pa crea mas interes pa e trabou di maestro.

Den algo mas cu mey ora nos a sali for di e officina, contento cu e informacion cu nos a ricibi. Pero tambe pa nota cu tin progreso riba algun tereno pa cu nos hobennan cu ta desea di sigui nan soño y lucha pa un estudio den exterior. Probablemente. manera a ser haci na 2021-2022, DUO lo bin bek den luna di april di e aña escolar aki, pa haci e follow-up y percura cu tur studiante na nos Islanan ta logra inscirbi na DUO y pa nan estudio preferi prome cu e deadline di dia 1 di mei 2023.

 

Red.