Na aña 1968 gobierno di Aruba a construi un scol na Cura Cabai cu ayudo financiero di E.E.G. E apertura oficial di Scol Caiquetio a tuma luga dia 1 di september di e mesun aña. E tempo ey Scol Caiquetio tabata conoci bou di e nomber “Basisschool voor speciaal onderwijs”.

Durante 1968-1969 meneer Hoefnagel a fungi como cabesante di scol. Na augustus 1969 te cu januari 1970 meneer de Valk a fungi como cabesante di scol durante 7 luna. Na aña 1970 Scol Caiquetio a haya un cabesante nobo Hans van Balkom y el a duna e scol un otro nomber “Caiquetios School”. Su señora Grace a pinta e indjan cu te awe ta sirbi como e emblema di scol.

E cabes di indjan ta representa e tribu di indjan Caiquetios cu tabata biba riba nos isla Aruba y cu tabata pertenece na e famia grandi di Arowak. Scol Caiquetio ta un scol Catolico Basico Special y ta cay bou di S.K.O.A. E muchanan ta haya e guia y e formacion segun e creyencia y pensamento Catolico. Scol Caiquetio ta un scol pa mucha cu tin dificultad cu siñamento. Apesar di e limitacion cu e muchanan aki tabatin, tur e lesnan tawata na Hulandes cu resultado desastroso.

Desde aña 1970 diferente cambio grandi y importante a tuma luga na Scol Caiquetio. Dia 1 augustus 1975 señora Francis T. Kelly a bira cabesante di Caiquetios School y a bin cu un di e cambionan structural di mas grandi. Na aña 1979 a introduci Papiamento y e cabesante tabata corigi y coordina e trabou. Tambe nan a introduci metodo nobo y a structura tur material di les y sistema di trabou. Despues nan a sigui traha material na Papiamento pa tur otro materia.

Dia 1 september 2001 e nomber Caiquetios School a cambia den Scol Caiquetio .